گورنر خیبر پختونخوا فیصل کریم کنڈی نے کہا ہے کہ صوبے کے عوام صدارتی پروکلیمیشن کا خیر مقدم کرتے ہیں اور امن، استحکام، ترقی اور خوشحالی کے خواہاں ہیں۔
صوبے کے عوام کے نام ویڈیو پیغام میں انہوں نے کہا ہے کہ صوبے کے عوام نے فیصلہ کرلیا ہے کہ وہ مزید فتنہ الخوارج کا ساتھ نہیں دیں گے اور سیکیورٹی اداروں کے شانہ بشانہ دہشت گردوں کے خلاف آخری دم تک لڑیں گے۔
فیصل کریم کنڈی کا کہنا ہے کہ خیبر پختونخوا کے عوام انتشار اور بدامنی کے بجائے پُرامن اور خوشحال مستقبل چاہتے ہیں، عوام دیگر صوبوں کے ساتھ برادرانہ تعلقات اور باہمی تعاون کے خواہاں ہیں اور مشترکہ کوششوں اور باہمی تجربات سے صوبے میں ترقی و خوشحالی کو فروغ دینا چاہتے ہیں۔
انہوں نے کہا ہے کہ خیبر پختونخوا کے امن پسند عوام دہشت گردی اور پُرتشدد کارروائیوں کی ہرگز حمایت نہیں کرتے۔
گورنر خیبر پختونخوا نے عوام سے اپیل کی کہ وہ کسی بھی قسم کی قانون شکنی، اشتعال انگیزی اور دنگا فساد سے اجتناب کریں۔
انہوں نے خبردار کیا ہے کہ امن و امان خراب کرنے اور قانون ہاتھ میں لینے والوں کے خلاف کارروائی کی جائے گی۔
